En domenia ai 28 de setember i Ladins entorn l Sela é envié a renovèr l veie leam de devozion co la Madona de Baissiston. Chest an l pelegrinaje vegn endrezà da l’Union di Ladins de Fascia ensema al Decanat de val che envìa duta la jent a fèr ence l percors de la Via Crucis. Se se troa entorn les 11.00 aló dal Mèsc Kehr a Neva Todescia (zona artejanèla) da olache ponta via la Via Crucis che sarà vidèda dal decan de Fascia don Giuseppe Da Prà. Se passarà sul percors più lonch, ma manco ert, olache l’an passà l’é stat benedì la cater stazions più modernes, fates dai studenc de la Scola d’Èrt de Poza. Te chesta ocajion vegnarà uzà fora l’adozion de la 14^ stazion de man de la Union di Ladins de Anpezo, Fodom y Col per la unité dla popolazion ladina dl Sela.Aló dal Santuar, olache l’é pervedù de ruèr da les 12.30, sarà n pìcol mezmesdì e la sonèdes de la Mùsega da Poza. Da les 13.40 preves, servidores, cores e gropes folk ge portarà l salut a la Madona e da les 14.00 vegnarà dit messa grana a l’averta per ladin e talian che sarà viventèda dai cores de gejia de Fascia.Da les 15.00 la Banda da Poza portarà dant n pìcol conzert tedant la Cèsa de la Cultura olache da les 15.15 l’é la prejentazion del liber “Santuari e pellegrinaggi delle genti ladine, mochene e cimbre” co l’autor Fiorenzo Degasperi e l’antropologh Cesare Poppi. “Me augure che l se renovèr de chest veie leam anter la jent ladina e la Madona de Baissiston – à dit l Prior del Santuar P. Lino Pacchin – deide a renovèr la fe te la neva generazions percheche les ciape la forza de se tor dant la vita con contenteza e coraje.”